Мэргэжлийн сүмогийн 68 дахь их аварга Асашёорюү энэ удаагийхн башёгоос эхлэн сүмо бөхийн дэвжээг бүрмөсөн орхихоор шийдсэн билээ. Өөрөөр хэлбэл их аварга Асашёорюүгүй анхны башё эхлэх гэж байна. Харин энэ үед их аварга хаана юу хийж байх нь олны анхаарлын  төвд байгаа юм. Ямар ч байсан их аварга маань Хару башё эхлэхээс гурав хоногийн өмнө буюу энэ сарын 11-нд Улаанбаатарт ирэхээр болжээ.  Их аваргыг Японы хэвлэл мэдээллийнхэн дагаж ирэх мэдээ байна. Асашёорюү ирсэн даруйдаа хэвлэлийн хурал хийлгэж, сэтгүүлчдийн асуултад нээлттэй хариулах аж. Үүний дараа Чингисийн хөшөөнд цэцэг өргөн, хүндэтгэл үзүүлж, Сүхбаатарын талбайд ард түмэнтэйгээ мэндчилэх гэнэ. Их аваргыг гуравдугаар сарын башё эхлэхийн өмнө шилжин явах цомоо өгнө гэсэн мэдээ байгаа. Гэвч их аварга Асашёорюү башёгийн үеэр Японд байхгүй бололтой.